གདུང་སེམས་མཉམ་སྐྱེད་ཀྱི་ངོ་རྒོལ་ཞུས་པ།

ཕྱི་ཟླ་ ༧  ཚེས་ ༡༧ རེས་གཟའ་པ་སངས་དགོང་དྲོ་སུད་སི་གྲོང་ཁྱེར་ཛུས་རིཀ་ཏུ་ས་གནས་འཐུས་ཚོགས་དང་།  ཡུ་རོབ་གཞོན་ནུ་བཅས་ནས་གོ་སྒྲིག་གི་ཚོུད་ ༡༨/༣༠  མི་གྲངས་ ༨༠༠ སྐོར་འདུ་འཛོམས་ཀྱིས་རྔམ་སྟོན་ཁྲོམ་སྐོར་དང་རྒྱ་ནག་གཞུང་བར་གོམ་བགྲོད་གནང་སོང་།  ང་ཚོས་ལས་འགུལ་སྤེལ་དགོས་དོན་འདི་ནི་ཆེས་ཤིན་ཏུ་ཡིད་སྐྱོ་བའི་གནས་ཚུལ་གཉིས་ཀྱི་ཐོག་ནས་ཡིན། དང་པོ། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་ནག་གི་བཙོན་ཁང་ནང་སྐུ་གཤེགས་པ་དང་། གཉིས་པ་ཕ་ཡུལ་ནང་ཆེན་ནས་ཡིན་པའི་དགེ་འདུན་པ་བསོད་ནམས་སྟོབས་རྒྱལ་ལགས་ཀྱིས་རང་ལུས་མེར་སྲེག་བཏང་བའི་ཡིད་སྐྱོའི་གནས་ཚུལ་ཐོན་སྟབས། རྒྱལ་གཅེས་པ་ཁོང་གཉིས་ལ་གདུང་སེམས་མཉམ་སྐྱེ་དང་མྱ་ངན་རྗེས་དྲན་ཞུ་ཆེད་གོ་སྒྲིག་ཞུས་པ་ཞིག་རེད།

ཞིང་བཤེགས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ནི་སྙིང་སྟོབས་དང་བོད་མི་རིགས་ལ་བཀའ་དྲིན་ཆེ་བས་དམ་པ་ཁོང་ང་ཚོའི་སེམས་ནང་བརྗེད་ཐབས་མེད་པའི་སྐྱེས་བུ་ཞིག་ཆགས་ཡོད། ང་ཚོས་དམ་པ་ཁོང་གི་བཀའ་དྲིན་དུས་རྟག་ཏུ་དྲན་དགོས་པ་ཞིག་རེད། ཞིང་བཤེགས་དམ་པ་ཁོང་ལྟ་བུར་མཚོན་ན། ༸གོང་ས་༸སྐྱབས་མགོན་ཆེན་པོ་མཆོག་ལ་དད་པ་དང་དམ་ཚིག་གཡོ་བ་མེད་པ་ཞིག་ཡིན་ཞིང་། བོད་མི་རིགས་ཀྱི་དོན་དུ་རང་གི་ཡོད་ཚད་བློས་གཏོང་གནང་ཐུབ་མཁན་གྱི་སྐྱེས་བུ་དམ་པ་ཞིག་ཆགས་ཡོད། དེར་བརྟེན་ཁོང་གི་མཛད་རྗེས་དེ་ང་ཚོས་དྲན་གསོ་ཞུ་དགོས་པ་ནི་ཧ་ཅང་གི་གལ་ཆེན་པོ་ཡིན་པ་སྨྲོས་མེད་དང་། རིན་པོ་ཆེ་མཆོག་ལ་སྙུན་གཞི་ཚབས་ཆེ་ཕོགས་ཡོད་སྟབས་ཁོང་གི་སློབ་མ་རྣམས་ཀྱིས་སྨན་བཅོས་མཐུན་འགྱུར་ཆེད་ཁོང་གློད་བཀྲོལ་གནང་དགོས་པའི་རེ་འདུན་བཏོན་པ་ང་ཚོས་ཤེས་ཀྱི་ཡོད། རིན་པོ་ཆེ་མཆོག་ལ་རྒྱ་ནག་གཞུང་གིས་སྨན་བཅོས་མཐུན་འགྱུར་ཡང་མ་སྤྲད་པ་མ་ཟད། སློབ་མ་རྣམས་ཀྱིས་ཁོང་བཙོན་ཁང་དུ་ཐེངས་གཅིག་མཇལ་རྒྱུའི་རེ་འདུན་བཏོན་པར་ཆོག་མཆན་མ་སྤྲད་པའི་བྱ་སྤྱོད་དེས་རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་ཇི་ཙམ་ལག་བསྟར་བྱེད་བཞིན་ཡོད་པ་ཧ་ཅང་གསལ་པོ་མཚོན་ཐུབ། རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་འདི་ལྟར་འཛིན་པ་དེས་བོད་མི་ཚོའི་སེམས་ནང་འཁོན་འཛིན་ཆེ་རུ་གཏོང་རྒྱུ་ཡིན།

དེ་བཞིན་ཨ་རིས་གཙོས་འཛམ་གླིང་ནང་གྲོས་ཚོགས་འཐུས་མི་མང་པོས་རྒྱ་ནག་གཞུང་གིས་སྲིད་བྱུས་དེར་སྐྱོན་བརྗོད་ཤུགས་ཆེ་བྱས་པ་དང་སྦྲགས། རིན་པོ་ཆེ་མཆོག་ལ་མྱ་ངན་གུས་འདུད་གནང་ཡོད། དེ་བཞིན་གནད་ཡོད་མི་སྣ་ཆེ་ཁག་ནས་ཡིད་སྐྱོ་བའི་གནས་ཚུལ་དེར་བློ་ཕམ་དང་། སེམས་འཚབ་ཡོད་པའི་རྣམ་པ་ཤུགས་ཆེ་བསྟན་ཡོད། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྐུ་ཚེ་ཧྲིལ་པོའི་རིང་བོད་ནང་གི་ཁོར་ཡུག་སྲུང་སྐྱོབ་དང་། ས་གནས་ཡུལ་མི་རྣམས་ཀྱི་ཤེས་ཡོན་གོང་སྤེལ། འཕྲོད་བསྟེན། ལྷག་པར་བོད་མི་འབྲོག་པ་རྣམས་ཀྱི་བདེ་དོན་ཆེད་ངལ་བ་ཁྱད་གསད་ཀྱིས་འབད་འབུངས་གནང་ཡོད།

གང་ལྟར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་ཁོང་གི་སྐུའི་ཡང་སྲིད་རིན་པོ་ཆེ་མགྱོགས་མྱུར་གངས་ཅན་ལྗོངས་སུ་འཁྲུངས་པའི་སྨོན་ལམ་དང་། དམ་པ་ཁོང་གི་བཀའ་དྲིན་ཡིད་ལ་བཅངས་པའི་ཐོག་ཐུགས་སྨོན་སྐྱབས་འཇུག་ཤུགས་ཆེ་གནང་ཡོད།  དེ་བཞིན་སྡེ་དགེ་རྫོང་སར་དགོན་གྱི་བཙུན་པ་བསོད་ནམས་སྟོབས་རྒྱས་ལགས་དགུང་ལོ་ ༢༦ ཡིན་པ་དང་ཕྱི་ལོ་ ༢༠༡༥ ཟླ་ ༧ ཚེས་ ༩ ཉིན་ཁམས་ཡུ་ཤུལ་སྐྱེ་རྒུ་མདོའི་དགེ་སར་ཐང་ཆེན་དུ་རང་ལུས་མེར་སྲེག་བཏང་གནང་སྟེ་འདས་གྲོངས་སུ་ཕྱིན་ཡོད། ད་བར་གཞིས་ལུས་བོད་མི་ཁྱོན་མི་གྲངས་ ༡༤༡ ནས་བོད་བསྟན་སྲིད་དང་མི་རིགས་ཆེད་རང་ལུས་མེར་སྲེག་བཏང་སྟེ། རྒྱ་གཞུང་ལ་ཞི་རྒོལ་གནང་ཡོད་པའི་ཁྲོད་ནས་བོད་མི་གྲངས་ ༡༢༡ འདས་གྲོངས་སུ་གྱུར་ཡོད། 

༡)  བོད་རྒྱལ་ཁབ་ཆེན་མོའི་རྒྱལ་གླུ་མཉམ་གཏོང་ཞུས།
༢)  སྐར་མ་གཅིག་རིང་མྱ་ངན་ངག་བཅད་ཞུས།
༣)  ཚོགས་གཙོ་བསྟན་འཛིན་སྙིང་པོ་ལགས་ནས་གསུང་བཤད་གནང་དོན།  བསྟན་འཛིན་བདེ་ལེགས་རིན་པོ་ཆེ་མཆོག་ལ་སྡུག་སྦྱོང་ཚད་མེད་ཀྱི་གནས་སྟངས་སྐོར་དང་།  དུས་ཚོད་གཉན་ཕྲན་ཅན་འདིར་གདུང་སེམས་མཉམ་སྐྱེད་དགོས་པ།  རང་གཞུང་གི་བཀའ་གསུང་ཅི་སྒྲུབ་ཞུ་དགོས་སོགས།
༤)  སྐད་འབོད་ཤུགས་དྲགས་བྱས།
༥)  རིན་པོ་ཆེའི་སྐུ་མཆེད་འཕྲིན་ལས་སྙན་གྲགས་ལགས་ནས་རིན་པོ་ཆེའི་མཛད་རྣམ་སྙིང་བསྡུས་ཤིག་ངོ་སྤྲོད་ཞུས་པ་དང་ཆབས་ཅིག  རིན་པོ་ཆེ་མཆོག་གི་སྐུ་གཟུགས་ཀྱི་གནས་སྟངས་ཐད་ཞིབ་སྐབས་རྒྱ་གཞུང་ནས་དམར་གསོད་བཏང་བར་ངོས་འཛིན་ཞུ་བ་དང་བཅས་མུ་མཐུད་ཞུ་འབོད་གནང་རྒྱུ་ཡིན་པ་གསུང།
༦)  ཆབ་སྲིད་བཙོན་ཟུར་གོ་ལོག་འཇིག་མེད་ལགས་ནས་གསུང་བཤད་སྙིང་བསྡུས་ཤིག
༧)  གཞོན་ནུའི་ཚོགས་གཙོ་ནས་རྒྱ་གཞུང་ལ་སྤྲོད་རྒྱུའི་ཡིག་ཆ་ངོ་སྤྲོད་གནང་བ་དང་མི་མང་ཚོགས་གཙོ་རྣམ་གཉིས་དང་གཞོན་ནུའི་ཚོགས་གཙོ་བཅས་ཆེད་བཅར་ཞུས།
༨)  དགོན་པའི་མཁན་རིན་པོ་ཆེས་དབུས་དགེ་འདུན་རྣམ་པ་མི་མང་བཅས་ནས་བདེན་ཚིག་སྨོན་ལམ་སོགས་གསུང་འདོན་དང་ཆབས་ཅིག་ཐེངས་འདིའི་ལས་འགུལ་མཇུག་སྒྲིལ་ཞུས་སོང་ས་འཐུས་འབྲོག་ཚ་ཚང་འོད་ཟེར་ལགས་ནས་ལས་རིམ་ངོ་སྤྲོད་ཞུས་བ་བཅས་ཀྱི་གནས་ཚུལ་སྒོ་སྤེ་ཡོན་རྒྱས།

འདྲ་པར་ཁག

མཆན་བུ། (༠)

མཆན་འགྲེལ་ཐོག་མ་དེ་ཁྱེད་ནས་འགོད་རོགས་ཞུ།

8 དང་ 8 སམས་རགས།