ཁམས་རྟའུ་རུ་རང་ལུས་མེར་བསྲེགས་གནང་འདུག

ད་ལྟ་རང་འདི་གའི་གསར་ཁང་ལ་གནས་ཚུལ་བཏང་འབྱོར་བྱུང་བ་ལྟར་ན། དེ་རིང་ཕྱི་དྲོའི་བོད་ནང་གི་ཆུ་ཚོད་ ༨།༠༠ ཙམ་ལ་ཁམས་རྟའུ་རྫོང་ཁང་སར་ཞིང་ཐོག་ཏུ་བོད་མི་ཞིག་གིས་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་ཡོད་འདུག

ས་གནས་མི་མང་ཚོས་བརྗོད་པ་ལྟར་ན། བསྟན་འཛིན་རྒྱ་མཚོ་ལགས་ཀྱིས་རང་ལུས་མེར་བསྲེགས་གནང་དགོས་དོན། ཉིན་ཤས་སྔོན་ནས་རྟའུ་རྫོང་དུ་རྒྱ་ནག་གི་ཉེན་རྟོག་པ་དང་དྲག་ཆས་དམག་དཔུང་ཧ་ཅང་མང་པོ་བསླེབས་ཏེ། མང་ཚོགས་ལ་འཇིགས་སྐུལ་དཔུང་ངོམ་བྱས་པ་མ་ཟད། དོན་དག་མེད་པར་ས་གནས་བོད་མི་ཚོར་གང་བྱུང་ཉེས་རྡུང་བཏང་བ་སོགས་བྱུང་ཡོད་སྟབས། ཁོང་གིས་སྣང་ཚུལ་དེར་སེམས་ཀྱིས་མ་བཟོད་པར་ཞི་བའི་ཡ་ལན་གྱི་ཚུལ་དུ་རང་ལུས་མེར་བསྲེགས་གནང་བ་ཞིག་ཡིན་འདུག

རྒྱལ་གཅེས་དཔའ་བསྟན་འཛིན་རྒྱ་མཚོ་ལགས་ནི། རྟའུ་རྫོང་ཁང་གསར་ཞིང་། ཁུ་ནན་གྲོང་པ་ནས་ཡིན་པ་དང་ད་ལྟ་རང་ལོ་ ༣༥ ཡིན་འདུག ཁོང་གི་སྐྱེས་དམན་གྱི་མིང་ལ་བསོད་ནམས་སྒྲོལ་མ་ཟེར་ཞིང་། ཁོང་བཟའ་མི་གཉིས་ལ་ཕྲུ་གུ་ ༤ ཡོད་པ་དག་ནི། སྟོབས་ལྡན་དང་ཐུབ་བསྟན། ཚེ་རིང་མཚོ་མོ། ཚེ་དབང་རྒྱ་མཚོ་བཅས་ཡིན་འདུག

བསྟན་འཛིན་རྒྱ་མཚོ་ལགས་ཀྱིས་རང་ལུས་མེར་བསྲེགས་གནང་རྗེས་ཤི་གསོན་གནས་ཚུལ་ད་དུང་ཤེས་རྟོགས་ཐུབ་མ་སོང་བས། གནས་ཚུལ་ཐོན་རིམ་བཞིན་ཁ་ཇེ་གསལ་དུ་གཏོང་ངེས་ཡིན།

ཐེངས་འདི་ནི་ ༢༠༠༩ ལོའི་ཟླ་ ༢ ཚེས་ ༢༧ ཉིན་རྔ་པ་ཀིརྟི་དགོན་པའི་དགེ་འདུན་པ་བཀྲ་བྷེ་ལགས་ཀྱིས་རང་ལུས་མེར་བསྲེགས་གནང་བའི་ཚུན་ལ། ད་བར་བོད་ཆོལ་ཁ་གསུམ་ཁྱོན་ཡོངས་སུ་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་མཁན་ཤེས་རྟོགས་གསལ་བོ་བྱུང་བའི་བོད་མི་ ༡༣༩ པ་དེ་ཆགས་ཡོད་པ་རེད།

http://www.tibettimes.net/news.php?showfooter=1&id=10063

མཆན་བུ། (༠)

མཆན་འགྲེལ་ཐོག་མ་དེ་ཁྱེད་ནས་འགོད་རོགས་ཞུ།

9 དང་ 6 སམས་རགས།