སྐད་ཡིག
ཕྱི་ལོ་ ༢༠༡༡ ལོའི་སུད་སི་ནང་ནོ་བྷེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༢༢ འཁོར་བའི་དུས་དྲན་རྒྱས་པ་སྲུང་བརྩིའི་མཛད་སྒོའི་སྐབས་གཟིགས་འབུལ་ཞུས་པས་བརྙན་འཕྲིན།
བོདཀྱི་རླུང་འཕྲིན་ཁག
སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་སྒྲིག་གཞི།
བོད་རྒྱལ་ལོ་ ༢༡༣༣ ཕྱི་ལོ་ ༢༠༠༦
ལེའུ་དང་པོ། སྒྲིག་གཞིའི་ངོ་བོ།
དོན་ཚན་དང་པོ། སྒྲིག་གཞིའི་མིང་།
སུད་སི་དང་ལེཀ་ཊེན་སྤྲཡནབོད་རིགས་མི་མང་གི་སྒྲིག་གཞི། བོད་རྒྱལ་ལོ་ ༢༡༢༢ ཕྱི་ལོ་ ༡༩༩༥
དོན་ཚན་གཉིས་པ། གནས་ཡུལ།
གཏན་འབེབས་མ་བྱུང་བར་མི་མང་གི་ལས་ཁུངས་གང་དུ་གནས་ས་དེར་ཆ་འཛིན་བྱ་རྒྱུ་དང་། ད་ལྟའི་ཆར་ས་གནས་འཛུ་རིག་ཡིན།
དོན་ཚན་གསུམ་པ། གཞི་འཛིན་སའི་ཁྲིམས་ཡིག
སྒྲིག་གཞི་འདི་སུད་སི་ཁྲིམས་ཡིག་དོན་ཚན་ཛེཊ་གེ་བེའེ་༦༠གཞིར་བཟུང་བ་ཡིན།
དོན་ཚན་བཞི་པ། དམིགས་ཡུལ།
- ཀ༽ གཞིས་བྱེས་བོད་མིའི་ཆོས་སྲིད་གཉིས་ཀྱི་དབུ་འཁྲིད་ྋགོང་ས་ྋསྐྱབས་མགོན་ཆེན་པོ་མཆོག་གི་ཡང་དག་མཛད་བྱུས་འོག་རང་རེའི་མང་གཙོའི་གཞུང་གི་དུས་བསྟུན་མཛད་ཕྱོགས་ལ་དང་ལེན་རྗེས་འབྲངས་ཀྱིས་འཚེ་མེད་ཞི་བའི་ཐོག་ནས་བོད་དོན་བདེན་མཐའ་གསལ་ཐབས་ཀྱི་འགུལ་མཐའ་དག་ལ་འབད་རྩོལ་དོན་འཁྱོལ་བྱ་རྒྱུ།
- ཁ༽ བོད་མི་ནང་ཁུལ་གྱི་མཐུན་བསྒྲིལ་ལ་ཤུགས་སྣོན་དང་མང་གཙོའི་ལམ་སྲོལ་སྲ་བརྟན་གོང་སྤེལ་ཐོག་ས་གནས་ཡུལ་ཁྲིམས་ལ་སྲུང་བརྩི་དང་ཡུལ་མིར་མཛའ་མཐུན་མཉམ་གནས་ཐུབ་ཐབས་བྱ་རྒྱུ།
- ག༽ རང་རེའི་ཆོས་དང༌། སྐད་ཡིག རིག་གཞུང་གཙོ་བོར་བྱས་པའི་ཆོས་སྲིད་ཟུང་འབྲེལ་གྱི་གོམས་གཤིས་བཟང་པོ་གཅེས་འཛིན་ཐོག་འཚར་ལོང་ཡོང་བཞིན་པའི་མི་རབས་གསར་པ་ཚོར་རྒྱུན་འཇགས་སྤེལ་ཐབས་བྱ་རྒྱུ།
- ང༽བཅའ་ཁྲིམས་ལེའུ་གཉིས་པ་དོན་ཚན་ ༡༢ ནང་གསེས་ ༤ ནང་གསལ་གསར་ཤོག་དང་། དུས་དེབ། རྩོམ་ཡིག་རིགས་སྤར་འགྲེམས་དང་ཁྱབ་སྤེལ་བྱ་རྒྱུ།
ལེའུ་གཉིས་པ། ཚོགས་མིའི་སྐོར།
དོན་ཚན་ལྔ་པ། ཚོགས་མིའི་ཡོངས་ཁུངས།
སུད་སི་དང་ལེཀ་ཊེན་སྤྲཡན་གནས་པའི་བོད་མི་ཡོངས་རྫོགས་སྨྲོས་ཅི། ཕ་མ་ཡ་གཅིག་མི་རིགས་གཞན་ཡིན་ཡང་བཙན་བྱོལ་བོད་མིའི་བཅའ་ཁྲིམས་དོན་ཚན་ ༨ ནང་གསེས་ ༡(༡) དང་ ༣(༢) དགོངས་དོན་ལྟར་སྒྲིག་གཞི་དང་ལེན་གྱིས་རང་ཉིད་ཞུགས་བློ་ཡོད་རིགས་འཛུལ་ཆོག་པ་ཡིན།
(༡)བོད་ཀྱི་མངའ་ཁོངས་སུ་སྐྱེས་པའི་བོད་པ་དང༌། རྒྱལ་ཁབ་གཞན་དུ་སྐྱེས་པའི་བོད་པ་རྣམས་བོད་ཀྱི་ཡུལ་མི་ཡིན། བོད་རིགས་ཕ་མ་གང་རུང་ལས་རྒྱལ་ཁབ་གཞན་དུ་སྐྱེས་པའི་རིགས་རྣམས་ཀྱང་བོད་ཀྱི་ཡུལ་མིར་ཞུགས་རྒྱུའི་ཐོབ་ཐང་ཡོད། བཅའ་ཁྲིམས་ཤོག་གྲངས་ ༤ ཡིག་ཕྲེང་ ༢ རྒྱལ་ཁབ་གཞན་གྱི་ཡུལ་མི་བོད་ཀྱི་ཡུལ་མི་དང་ལུགས་མཐུན་གཉེན་སྒྲིག་བྱས་ཏེ་མུ་མཐུད་ལོ་གསུམ་ལས་བརྒལ་བ་རྣམས་བོད་ཀྱི་ཡུལ་མིར་ཟུགས་འདོད་ཡོད་ཚེ་སྤྱི་འཐུས་ལྷན་ཚོགས་ཀྱི་གཏན་འབཻབས་སྒྲིག་གཞི་ལྟར་ཞུགས་ཆོག བཅའ་ཁྲིམས་ཤོག་གྲངས་ ༤ ཡིག་ཕྲེང་ ༡༠
དོན་ཚན་དྲུག་པ། ཚོགས་མིའི་ཐོབ་ཐང༌།
- ཀ༽བཙན་བྱོལ་བོད་མིའི་བཅའ་ཁྲིམས་དོན་ཚན་ ༡༡(༣)ནང་གསལ་འོས་ཆོས་ཚང་བའི་ཚོགས་མི་ཚང་མར་སུད་སི་དང་ལེཀ་ཊེན་སྤྲཏན་བོད་རིགས་མི་མང་འཐུས་མིའི་གྲོས་ཚོགས་ སྤྱི་མི་ རང་བདེན་ཚོགས་ཆུང་གི་ཚོགས་མི། འོས་བསྡུ་དང༌། འོས་གཞིར་ཞུགས་ཆོག་པའི་ཐོབ་ཐང་ཡོད།
- ཁ༽ བོད་མི་སུ་ཡིན་རུང་སུད་སི་དང་ལེཀ་ཊེན་སྤྲཏན་བོད་རིགས་མི་མང་གི་འཐུས་མིའི་ཚོགས་འདུའི་སྐབས་ གྲོས་ཚོགས་ སྤྱི་མི་ རང་བདེན་ཚོགས་ཆུང་གི་ཚོགས་མི། ཟུར་ཉན་ལ་ཕེབས་ཆོག་པ་ཡིན། འོན་ཀྱང་བགྲོ་གླེང་དང་ཐག་གཅོད་གནང་བའི་དབང་ཆ་མེད།
(༣)སྤྱི་འཐུས་ཀྱི་འོས་བསྡུ་དང༌། འོས་གཞིའི་ཐོབ་ཐང༌། ཁྲིམས་ལུགས་ཁག་གཞིར་བཟུང་འོས་བསྡུའི་ཐོབ་ཐང་བྲལ་བ་ཕུད། དེ་མིན་བོད་ཀྱི་ཡུལ་མི་སེར་སྐྱ་ཕོ་མོ་རང་ལོ་བཅོ་བརྒྱད་ཧྲིལ་པོར་ལོན་པ་ཡན་ཚང་མར་འོས་བསྡུའི་ཐོབ་ཐང་དང༌། ཁྲིམས་ལུགས་ཁག་གཞིར་བཟུང་འོས་གཞིར་ཞུགས་རྒྱུའི་ཐོབ་ཐང་བྲལ་བ་ཕུད། དེ་མིན་བོད་ཀྱི་ཡུལ་མི་སེར་སྐྱ་ཕོ་མོ་རང་ལོ་ཉེར་ལྔ་ཧྲིལ་པོར་ལོན་པ་ཡན་ཚང་མར་འོས་གཞིར་ཞུགས་པའི་ཐོབ་ཐང་ཡོད། བཅའ་ཁྲིམས་ཤོག་གྲངས་ ༦ ཡིག་ཕྲེང་༤
དོན་ཚན་བདུན་པ། ཚོགས་མིའི་ལས་འགན།
- ཀ༽ བཙན་བྱོལ་བོད་མིའི་བཅའ་ཁྲིམས་དང༌། བཙན་བྱོལ་བོད་གཞུང་གི་ཁྲིམས་ལུགས། བཀའ་རྩ། ཆབ་སྲིད་དབང་འཛིན་གྱི་བཀའ སྒྲིག་གཞི་བཅས་ལ་མི་འགལ་བ་དང༌། སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་སྒྲིག་གཞིར་བསྲུང་བརྩི་དང་ལེན་ཞུ་རྒྱུ།
- ཁ༽ས་གནས་འཐུས་མི་རྣམས་ནས་ཐུས་མི་དང་རང་བདེན་ཚོགས་ཆུང་གི་ཚོགས་མི་ཕྱི་ཟླ་ ༡་༣་༤་༥་༦་༩་༡༠་༡༡་༡༢ བཅས་ལོ་རེར་ཐེངས་དགུ་རེ་ཚོགས་འདུ་ཚོགས་རྒྱུ། ཟླ་བ བདུན་པ་དེ་དགུང་སེང་ལ་ངེས་པ་ཡིན། ལོ་གསུམ་རེའི་རྗེས་འཐུས་མི་འཕོ་འགྱུར་གྱི་དུས་བསྟུན་ཟླ་བ་དགུ་པ་༩ རྟག་པར་ལོའི་ཚོགས་འདུ་རིམ་པའི་དུས་ཚོད་དང༌། ཚོགས་ཡུལ་བཅས་བཀའ་བསྡུར་གཏན་འབེབས་གནང་རྒྱུ། སྐབས་འཚམས་ཚོགས་དུས་དང་ཚོགས་ཡུལ་འགྱུར་བ་གཏོང་དགོས་རིགས་རྒྱུན་ལས་ནས་ཐག་གཅོད་ཀྱིས་གསལ་བསྒྲགས་བྱ་རྒྱུ།
- ག༽བཅའ་ཁྲིམས་དོན་ཚན་ ༡༣(༤)དགོངས་དོན་ཆ་ཚང་དང་ལེན་ཞུ་རྒྱུ།
(༤)ཡུལ་མིའི་ལས་འགན། བོད་ཀྱི་ཡུལ་མི་ཚང་མས་བསྒྲུབ་དགོས་པའི་ལས་འགན་གཤམ་གསལ།
ལེའུ་གསུམ་པ། སྤྱི་དངུལ་སྐོར།
དོན་ཚན་བརྒྱད་པ། སྤྱི་དངུལ་འདུ་འགོད།
- ཀ༽མི་མང་སྤྱི་དངུལ་ཡོང་ཁུངས་ནི་དུས་ཆེན་ཁག་དང༌། དེ་མིན་ལས་འགུལ་སྣ་ཚོགས་ནས་བྱུང་བའི་ཁེ་འབབ་དང༌། སྤྱི་སྒེར་ལྷག་བསམ་ཅན་གྱི་ཞལ་འདེབས། དངུལ་ཁང་དུ་བཅོལ་འཇོག་བྱས་པའི་སྐྱེད་འབབ་བཅས་ཡིན།
- ཁ༽མི་མང་སྤྱི་དངུལ་ལ་སྨན་པའི་དཔལ་འབྱོར་བཟོ་སྒྲུབ་ཀྱི་ལས་འགན་ཡོངས་རྫོགས་འཐུས་མིའི་ཚོགས་འདུར་ཡོད། གྲོས་ཚོགས། ཐུས་མི། རང་བདེན་ཚོགས་མི།
དོན་ཚན་དགུ་པ། སྤྱི་དངུལ་བཅོལ་འདོན།
- ཀ༽སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་མཚན་ཐོག་ནས་དངུལ་ཁང་སྐྱེད་བཅོལ་དང་བཅུག་འདོན། གཏོང་ལེན་བཅས་རྩིས་ཀྱི་འགན་འཁུར་ཡོངས་རྫོགས་ཚོགས་གཙོ་སྦྲེལ་པོས་ལམ་སྟོན་འོག་དངུལ་གཉེར་གཉིས་ལ་ཡོད།
༡ ཛ་དྲག་ལས་དོན་ཆེད་ལོ་རེར་ཚོགས་གཙོ་སྦྲེལ་པོ་མཆོག་ནས་སུད་སྒོར་ ༡༠༠༠།༠༠ འགྲོ་གྲོན་གཏོང་ཆོག་རྒྱུ།
༢ ཛ་དྲག་ལས་དོན་ཆེད་ལོ་རེར་རྒྱུན་ལས་མང་མོས་སམ་སྤྱི་མོས་ཀྱིས་སུད་སྒོར་ ༣༠༠༠།༠༠ རེ་འགྲོ་གྲོན་གཏོང་ཆོག་རྒྱུ་དང་། ལོ་རེར་སུད་སྒོར་ ༣༠༠༠།༠༠ ཡན་འགྲོ་སོང་གཏོང་དགོས་བྱུང་ཚེ་འཐུས་མི་རྩ་འབོར་གསུམ་ཆ་གཉིས་ཡན་གྱིས་མོས་མཐུན་དགོས།
- ཁ༽མི་མང་སྤྱི་དངུལ་སྤྲོད་ལེན་གྱི་རྩིས་ཁྲ་ཁག་ལ་རྩིས་ཞིབ་འཐུས་ནན་ཡོང་ཆེད་མི་མང་འཐུས་མིའི་ཚོགས་འདུ་ནས་དམིགས་བསལ་རྩིས་ཞིབ་པ་གཉིས་འོས་འདེམས་བྱ་དགོས་པ་ཡིན།
- ག༽ནམ་ཞིག་མི་མང་གི་སྒྲིག་འཛུགས་འདི་མི་དགོས་པ་ཆགས་ཚེ་སྤྱི་དངུལ་རྣམས་སྒྲིག་གཞི་ལེའུ་དང་པོའི་དོན་ཚན་བཞི་པ་གཞིར་བཟུང་བོད་པའི་བདེན་དོན་ཆེད་གཏོང་དགོས།
དོན་ཚན་བཅུ་པ། འགྲིམ་འགྲུལ་དང༌། ཁ་དཔར་གླ།
- ཀ༽ཚོགས་གཙོ་དང༌། ཚོགས་གཞོན་གཉིས་སྤྱིའི་ལས་དོན་ཆེད་འགྲིམ་འགྲུལ་འགྲོ་སོང་མེ་འཁོར་སོགས་ཀྱི་གླ་བབ་ཕྱེད་བཅག་ཇི་ཐོབ་ལོ་རེའི་མཚམས་སུ་རྩིས་ཞུ་ཆོག་པ་ཡིན།དེ་ཐོག་ལོ་གསུམ་གྱི་མེ་འཁོར་གླ་འབབ་ཕྱེད་བཅག་སྡེབ་ཉོས་རིན་པོར་རྩེས་ཏེ་ཞབས་ལོ་གསུམ་འཁོར་མཚམས་རིན་འབབ་ཇི་གནས་ཐོབ་རྒྱུ། ཁ་པར་དང་། གློག་འཕྲིན་གཏོང་དོད་མི་རེར་ཟླ་རེར་སུད་སྒོར་སུམ་ཅུ་སོ་ལྔ་རེ་མི་མང་སྤྱི་དངུལ་ནས་གཏོང་ཆོག་རྒྱུ།
- ཁ༽ས་གནས་འཐུས་མི་སུ་ཞིག་ནས་རང་ཁུངས་ཚོགས་ཆུང་གི་ས་གནས་ལས་དོན་མ་ཡིན་པའི་མི་མང་སྤྱིའི་ལས་དོན་ཆེད་དམིགས་བསལ་ཕེབས་དགོས་བྱུང་རིགས་ལ་འགྲིམ་འགྲུལ་དོད་གླ་ཆ་ཆ་ཚང་རྩིས་ཁྲ་གཞིར་བཟུང་སྤྱི་དངུལ་ནས་གཏོང་རྒྱུ།
- ག༽ས་གནས་འཐུས་མི་རྣམས་ཀྱི་ཡིག་ཆས་དང༌། ཌག་གླ། འགྲིམ་འགྲུལ་དོད་སོགས་སྤྱི་དོན་འགྲོ་སོང་ཚང་མ་རང་ཁུངས་མི་མང་ནས་དགོངས་བཞེས་ཐག་གཅོད་གནང་དགོས།
- ང༽སྤྱི་དོན་ཆེད་རང་ཉིད་ཀྱི་གནས་ཡུལ་ལས་བརྒལ་ཏེ། རྒྱལ་ཁབ་གཞན་ཞིག་ཏུ་འགྲོ་དགོས་རིགས་བྱུང་ཚེ། འགྲིམ་འགྲུལ་དོད་ཇི་ཐོབ་རྩིས་ཁྲ་ཆ་ཚང་མི་མང་གི་སྤྱི་དངུལ་ནས་གཏོང་ཆོག་རྒྱུ།
- ཅ༽འཐུས་མིའི་རྒྱུན་ལས་ཚོགས་འདུའི་ལམ་གྲོན། འཐུས་མིའི་རྒྱུན་ལས་ཚོགས་འདུའི་ལམ་གྲོན་ཕྱེད་འབབ་རྩིས་ཁྲ་གཞིར་བཟུང་རྒྱུན་ལས་ཡོང་སའི་ཚོགས་ཆུང་སོ་སོས་གཏོང་དགོས།
དོན་ཚན་བཅུ་གཅིག་པ། ཚོགས་མིར་བརྡབ་ཆག
- ཀ༽ཚོགས་མིར་བརྡབ་ཆག་དང༌། ནད་མནར། འཆི་སྐྱོན་སོགས་བྱུང་རིགས་ལ་ཕན་ཚུན་བལྟ་སྐྱོང་དགོས་ངེས་ཙམ་ལས། དངུལ་དངོས་ཐོག་ནས་ཉེན་སྲུང་འགན་ལེན་མེད།
དོན་ཚན་བཅུ་གཉིས་པ། སྤྱིའི་སྤྲོད་འཇལ།
- ཀ༽མི་མང་སྤྱིའི་སྤྲོད་འཇལ་རིགས་མི་མང་སྤྱི་དངུལ་ལ་འཁྲི་བ་ཡིན།
- ཁ༽ལས་བྱེད་སུ་ཞིག་ནས་གལ་སྲིད་སྤྱི་དངུལ་བོར་བརླག་བྱུང་རིགས་དོ་བདག་རང་ཉིད་ནས་ཆ་ཚང་སྒྲུབ་འཇལ་དགོས་རྒྱུ།
དོན་ཚན་བཅུ་གསུམ་པ།
སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་གསར་འཕྲིན་དང༌།
ཟློས་གར་ཚོགས་པ།
- ཀ༽ སྒྲིག་གཞི་དོན་ཚན་བཞི་པའི་(ང་) པ་ནང་གསལ་སུད་སི་དང་ལེཀ་ཊེན་སྤྲཡན་བོད་རིགས་མི་མང་གསར་འཕྲིན་གྱི་རྩོམ་སྒྲིག་སྤྱི་ཁྱབ་པ་གཞིས་ཁོངས་མི་མང་ནས་འོས་འཚམས་སུར་ཡང་ས་གནས་འཐུས་མིའི་ཚོགས་འདུ་ནས་འོས་འདེམས་དགོས་རྒྱུ་དང༌། ས་གནས་འཐུས་མིའི་རྒྱུན་ལས་ཀྱི་སྐུ་ཚབ་རྒྱུན་ལས་ནས་ལས་བགོས་བྱ་རྒྱུ། ས་གནས་འཐུལ་མིའི་ནང་ནས་སྐུ་ཚབ་གཅིག་འདེམས་རྒྱུ་དང་དེ་ཡང་འཐུས་མིའི་རྒྱུན་ལས་ཡིན་པ་ཞིག་དགོས། དེ་མིན་ལས་རོགས་ཇི་དགོས་དང་། འཛིན་སྐྱོང་བྱེད་ཕྱོགས་རང་དབང་གིས་སྒྲིག་གཞི་འཐུས་ཚོགས་ནས་གཏན་འབེབས་ཞུས་པ་ཟུར་གསལ་ལྟར་ལག་བསྟར་བྱ་རྒྱུ།
- ཁ༽ སུད་སི་དང་ལེཀ་ཊེན་སྤྲཡན་བོད་རིགས་མི་མང་ཟློས་གར་འགན་འཛིན་སྤྱི་ཁྱབ་ས་གནས་འཐུས་མིའི་ཚོགས་འདུ་ནས་འཐུས་མིའི་རྒྱུན་ལས་སུར་འོས་ཞིག་ལ་འོས་འདེམས་དགོས་རྒྱུ་དང༌། འགན་འཛིན་ལས་རོགས་ཞིག་ས་གནས་འཐུས་ཚོགས་དང་། ཟློས་གར་ཚོགས་མི་ཐུན་མོང་ནས་བོད་མི་སུ་འོས་ཤིག་འོས་འདེམས་བྱ་རྒྱུ། དགེ་རྒན་ཆེན་མོ་དང་། རྩིས་པ། གཞན་ཡང་ལས་བྱེད་ཇི་དགོས་ཟློས་གར་འགན་འཛིན་རྣམ་པ་དང་། ཚོགས་མིས་བོད་མི་འོས་མཚམས་སུར་ཡང་འོས་འདེམས་ཆོག་རྒྱུ། འཛིན་སྐྱོང་བྱེད་ཕྱོགས་ཐད་འཐུས་ཚོགས་ནས་གཏན་འབེབས་ཞུས་པའི་རང་དབང་གི་སྒྲིག་གཞི་ལག་བསྟར་བྱ་རྒྱུ།
- ག༽སུད་སི་དང་ལེཀཊེན་སྤྲཡན་བོད་རིགས་མི་མང་གི་བོད་སློབ་སྤྱི་ཁྱབ་འགན་འཛིན་ཞིག་ས་གནས་འཐུས་མིའི་ཚོགས་འདུ་ནས་འཐུས་མིའི་རྒྱུན་ལས་སུར་འོས་ཞིག་ལ་འོས་འདེམས་དགོས་རྒྱུ། བོད་སློབ་འཛིན་སྐྱོང་བྱ་ཕྱོགས་ཐད་འཐུས་ཚོགས་ནས་བཏན་འབེབས་ཞུས་པའི་རང་དབང་གི་སྒྲིག་གཞི་ལག་བསྟར་བྱ་རྒྱུ།
དོན་ཚན་བཅུ་བཞི་པ། རང་བཙན་བསྐྱར་ལེན།
རང་གི་རྒྱལ་ཁབ་དང༌། མི་རིགས་ཀྱི་ཁེ་ཕན་ཆེ་ཤོས་བོད་དོན་བདེན་མཐའ་གསལ་ཐབས་ཀྱིས་མཚོན་པའི་རྒྱལ་ཁབ་དང་མི་རིགས་ཀྱི་ལས་དོན་ཆེ་ཕྲ་ཡོངས་རྫོགས་འཚེ་མེད་ཞི་བའི་ལམ་ནས་བསྒྲུབ་རྒྱུའི་ཆེད། བཙན་བྱོལ་བོད་མིའི་བཅའ་ཁྲིམས་ནང་འཁོད་དོན་ཚན་ཁག་དང་འབྲེལ་བ་ཡོད་པའི་ལས་དོན་ཅི་རིགས་སྤང་བླང་འཛོལ་མེད་ལག་ལེན་དུ་འཁེལ་ཐུབ་པ་ཞུ་རྒྱུ།
ལེའུ་བཞི་པ། སྒྲིག་གཞི་རྩ་འཛིནདང་བསྐྱར་བཅོས།
དོན་ཚན་བཅོ་ལྔ་པ། སྒྲིག་གཞི་རྩ་འཛིན།
སྒྲིག་གཞི་གསར་པ་འདི་གཏན་འབེབས་འགོ་འཛུགས་བྱས་པ་ནས་བཟུང༌། སྔོན་གྱི་སྒྲིག་གཞི་དེ་དག་རང་ཤུགས་ཀྱིས་ཕྱིར་བསྡུ་ཟིན་པར་ཆ་འཇོག་དགོས་རྒྱུ།
དོན་ཚན་བཅུ་དྲུག་པ། སྒྲིག་འཛུགས་ཀྱི་གནས་སྟངས༌།
སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་སྒྲིག་འཛུགས་སུད་སི་དང་ལེཀ་ཊེན་སྤྲཡན་བོད་རིགས་མི་མང་ས་གནས་འཐུས་ཚོགས་ཀྱི་ཁྱབ་ཁོངས་གྲོས་ཚོགས་ཀྱི་སྒྲིག་གཞི་འོག་ཁྲིམས་སྲོལ་ལྟར་གནས་དགོས།
དོན་ཚན་བཅུ་བདུན་པ། སྒྲིག་གཞི་བསྐྱར་བཅོས།
སྒྲིག་གཞི་འདི་ལ་བསྐྱར་བཅོས་ནམ་དགོས་མཚམས་འཐུས་མི་སོ་སོས་རང་ཁུངས་ས་གནས་མི་མང་དང་གོ་བསྡུར་གྱིས་མང་མོས་རྒྱབ་གཉེར་ཐོབ་མཚམས་འཐུས་མི་སུམ་ཆ་གཉིས་ཀྱིས་མོས་མཐུན་བྱུང་ཚེ་སྒྲིག་གཞིར་བསྐྱར་བཅོས་ཆོག་རྒྱུ་བཅས་སོ།།
༄༅། ། སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་ས་གནས་འཐུས་མིའི་ཚོགས་འདུའི་སྒྲིག་གཞི།
དོན་ཚན་དང་པོ། སྒྲིག་གཞིའི་མིང༌།
སྒྲིག་གཞི་འདི་ལ་སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་ས་གནས་འཐུས་མིའི་ཚོགས་འདུའི་སྒྲིག་གཞི། (ས་གནས་གྲོས་ཚོགས་)
བོད་རྒྱལ་ལོ་ ༢༡༢༢ ཕྱི་ལོ་ ༡༩༩༥ ཞེས་འབོད་རྒྱུ།
དོན་ཚན་གཉིས་པ། སྒྲིག་གཞིའི་ཆ་རྐྱེན།
སྒྲིག་གཞི་འདི་བཙན་བྱོལ་བོད་མིའི་བཅའ་ཁྲིམས་དོན་ཚན་ ༨༧༡ འོག་བཀོད་བསྒྲིགས་བྱས་པ་ཡིན།
དོན་ཚན་གསུམ་པ། ཚོགས་འདུའི་གྲུབ་ཆ།
ཀ༽སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་ས་གནས་འཐུས་མིའི་ཚོགས་འདུའི་གྲུབ་ཆ་ནི། བོད་མི་ཁྱིམ་ཚང་བཅོ་བརྒྱད་ཡན་ཡོད་སའི་ས་གནས་ཁག་ནས་འོས་འདེམས་བྱས་པའི་ཚོགས་འཐུས་གཉིས་རེ་དང༌། བོད་མི་ཁྱིམ་ཚང་ལྔ་ནས་བཅུ་བདུན་བར་ཡོད་སའི་ས་གནས་ཁག་ནས་འོས་དེམས་བྱས་པའི་ཚོགས་འཐུས་རེ་དགོས་པ་ཡིན།
ད་ལྟའི་ཚོགས་འཐུས་ཀྱི་གྲངས་དང་ཡོང་ཁུངས་གཤམ་གསལ།
- ༡ ཨར་གྷའོ་ཡི་ཚོགས་འཐུས།
- ༢ བྷ་སལ་གྱི་ཚོགས་འཐུས།
- ༣ བྷེན་ཚོགས་འཐུས།
- ༤ ཕ་ལཱ་ཝིལ་དང་ཨུཛ་ཝིལ་གྱི་ཚོགས་འཐུས།
- ༥ ཇི་ནེ་ཝའི་ཚོགས་འཐུས།
- ༦ གྷེ་ལཱ་རུ་སེ་ཡི་ཚོགས་འཐུས།
- ༧ ཧོར་གྷན་གྱི་ཚོགས་འཐུས།
- ༨ ལན་ཊེ་ཀོཊ་ཡི་ཚོགས་འཐུས།
- ༩ ལེཀ་ཊེནསྤྲཡན་གྱི་ཚོགས་འཐུས།
- ༡༠ ལུ་རྫན་གྱི་ཚོགས་འཐུས།
- ༡༡ མུན་ཁུ་ཝི་ལན་དང་ཝིལ་གྱི་ཚོགས་འཐུས།
- ༡༢ ཨོ་ཏ་ཝིལ་གྱི་ཚོགས་འཐུས།
- ༡༣ ཡོ་ན་དང་ར་སྤར་སེ་ཝིལ་གྱི་ཚོགས་འཐུས།
- ༡༤ རི་ཀོན་གྱི་ཚོགས་འཐུས།
- ༡༥ རི་ཀོན་ཆོས་འཁོར་དགོན་གྱི་ཚོགས་འཐུས།
- ༡༦ རུ་ཏིའི་ཚོགས་འཐུས།
- ༡༧ ཊོར་གྷན་གྱི་ཚོགས་འཐུས།
- ༡༨ ཐུར་བྷེན་ཐལ་གྱི་ཚོགས་འཐུས།
- ༡༩ ཨུཛ་ནག་གི་ཚོགས་འཐུས།
- ༢༠ ཕོལ་ཀེ་སི་ཝིལ་གྱི་ཚོགས་འཐུས།
- ༢༡ ཝེ་དེན་སི་ཝིལ་གྱི་ཚོགས་འཐུས།
- ༢༢ ཝཏ་ཝིལ་གྱི་ཚོགས་འཐུས།
- ༢༣ འཛུ་རིག་གི་ཚོགས་འཐུས།
བཅས་ཡོད་ན་གནས་དུས་དང་མཚམས་པའི་ཚོགས་ཆུང་གསར་འཛུགས་དང་ཕྱིར་བསྡུ་ཇི་དགོས་ས་གནས་གྲོགས་ཚོགས་ནས་ཐག་གཅོད་བྱ་འཐུས།
ཁ༽བོད་མི་གནས་ཡུལ་ས་གནས་འཕར་ཆག་དབང་གིས་ཚོགས་འདུའི་འཐུས་མིའི་ཁ་གྲངས་འཕར་ཆག་གཏོང་དགོས་ནམ་བྱུང་མཚམས་འཐུས་མི་ཚོགས་འདུའི་རྩ་འབོར་གྱི་སུམ་ཆ་གཉིས་ཡན་གྱི་མོས་མཐུན་བྱུང་ན་བཅའ་ཁྲིམས་དོན་ཚན་ ༧༩ པའི་ནང་གསེས་དང་པོའི་༢ ནང་གསལ་གྱི་མང་མཐའ་དང་ཉུང་མཐའ་ལས་མ་བརྒལ་བར་འཕར་ཆ་གཏོང་འཐུས།
༢ ས་གནས་འཐུས་མིའི་གྲངས་ཚད་ཐད་ས་གནས་ཆེ་ཆུང་ལ་གཞིགས་པའི་ཚོགས་མི་གྲངས་ ༣༥ ལས་མི་བརྒལ་བ་དང་ ༡༡ ལས་མི་ཉུང་བ་དགོས། བཅའ་ཁྲིམས་ཤོག་གྲངས་ ༦༩ ཡིག་ཕྲེང་ ༧
དོན་ཚན་བཞི་པ། འཐུས་མིའི་ཡོང་ཁུངས།
- ༡༽ ས་གནས་འཐུས་མིའི་ཡོང་ཁུངས་ནི། གཞིས་ཆགས་སམ་སློབ་སྦྱོང༌། ཡང་ན་ལས་བྱེད་ཀྱི་ངོ་བོར་སུད་སི་དང་ལེཀ་ཊེན་སྤྲཡན་ན་གཏན་སྡོད་བྱས་པའི་བོད་རིགས་ཡོངས་རྫོགས་ལ་རང་ཁུངས་ས་གནས་གང་ཡིན་གཅིག་ཏུ་འཐུས་མི་འོས་བསྡུ་བྱ་རྒྱུའི་ཐོབ་ཐང་ཡོད།
- ༢༽ སུད་སི་དང་ལེཀ་ཊེན་སྤྲཡན་ན་གཏན་སྡོད་བོད་མི་སུའང་བཅའ་ཁྲིམས་དོན་ཚན་ ༣༨ ནང་གསལ་འོས་ཆོས་ཚང་བ་རྣམས་འོས་གཞིར་ཞུགས་པའི་ཐོབ་ཐང་ཡོད། སུད་སི་དང་ལེཀ་ཊེན་སྤྲཡན་ན་གཏན་སྡོད་ཅེས་པ་ནི། ཡུལ་འཁོར་སྤྲོ་འཆམ་པ་ལྟ་བུར་དུས་ཡུན་ངེས་ཅན་ཆེད་ཡོང་མཁན་ཞིག་མ་ཡིན་པ་དང༌། དང་བླང་དཔྱ་ཁྲལ་འབུལ་དེབ་སུད་སི་དང་ལེཀ་ཊེན་སྤྲཡན་ན་ཡོད་པ། བོད་མི་གནས་སྡོད་ས་གནས་གཞན་ཞིག་ཏུ་ས་གནས་འོས་བསྡུའི་ཐོབ་ཐང་ལ་ལོངས་མི་སྤྱོད་མཁན་ཞིག་དགོས།
དོན་ཚན་ལྔ་པ། ས་གནས་འཐུས་མིའི་ཚོགས་འདུའི་དབང་ཚད། ས་གནས་གྲོས་ཚོགས།
- ༡༽ ས་གནས་ཀྱི་ལས་དོན་དང་འབྲེལ་བའི་སྒྲིག་གཞི་བཟོ་འགོད་དང༌། འཆར་འཕར་གྱི་ལས་དོན། སྲིད་བྱུས་གཏན་འབེབས་བྱ་རྒྱུའི་འགན་དབང་ཡོངས་རྫོགས་ས་གནས་འཐུས་མིའི་ཚོགས་འདུར་ཡོད་པ་དང༌། གལ་ཆེའི་དོན་གནད་རིགས་མི་མང་ལ་མོལ་དྲི་བྱ་དགོས། འོན་ཀྱང་མཐའ་མའི་གཏན་འབེབས་མ་བྱས་གོང་ས་གནས་འགོ་འཛིན་དང༌། འགོ་འཛིན་ལས་རོགས། ཡོད་ན། དེ་དག་ལ་གོ་བསྡུར་བྱ་དགོས།
- ༢༽བཅའ་ཁྲིམས་དོན་ཚན་ ༨༣༣ དགོངས་དོན། བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་ཟིན་པའི་ཁྲིམས་ལུགས་དང༌། སྒྲིག་གཞི་ཁག་གི་དམིགས་བསལ་དོན་གནད་རྣམས་ཕུད། དེ་མིན་དོན་གནད་གང་ཅིའི་སྐོར་ལ་སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་འཐུས་མིའི་ཚོགས་འདུ་ནས་གྲོས་བསྡུར་གྱིས་སྤྱི་མོས་སམ། མང་མོས་ཇི་བྱུང་ཐག་གཅོད་བྱ་རྒྱུ།
༣ ས་གནས་འཐུས་མིའི་ཚོགས་འདུའི་ནང་འོས་བསྡུ། སྤྱི་འཐུས་ལྷན་ཚོགས་ནས་གཏན་འབེབས་ཟིན་པའི་ཁྲིམས་ལུགས་དང༌། སྒྲིག་གཞི་ཁག་གི་དམིགས་བསལ་དོན་གནད་རྣམས་ཕུད། དེ་མིན་དོན་གནད་གང་ཅིའི་སྐོར་ལ་ས་གནས་འཐུས་མིའི་ཚོགས་འདུ་ནས་གྲོས་བསྡུར་གྱིས་སྤྱི་མོས་སམ། ཡང་ན། མང་མོས་ཇི་བྱུང་ལ་ཐག་གཅོད་བྱ་རྒྱུ།
བཅའ་ཁྲིམས་ཤོག་གྲངས་ ༧༡ ཡིག་ཕྲེང་ ༧
དོན་ཚན་དྲུག་པ། འཐུས་མིའི་འོས་འདེམས།
གཏན་འབེབས་ས་གནས་སོ་སོ་ནས་འཐུས་མི་འོས་འདེམས་བྱ་རྒྱུའི་འོས་བསྡུའི་ལས་རིམ་ཡོངས་རྫོགས་དབུས་སྤྱི་ཁྱབ་འོས་བསྡུ་ལས་ཁང་གི་གཟིགས་སྐྱོང་འོག་ས་གནས་འོས་བསྡུ་ཚོགས་ཆུང་ནས་བྱ་དགོས།
དོན་ཚན་བདུན་པ། ས་གནས་འཐུས་མིའི་ཡུན་ཚད།
ས་གནས་འཐུས་མིའི་ཚོགས་འདུའི་ཡུན་ཚད་མ་རྫོགས་གོང་འཕོ་འགྱུར་གཏོང་དགོས་ཀྱི་གནས་ཚུལ་བྱུང་ན་ལས།
དེ་མིན་བཅའ་ཁྲིམས་དོན་ཚན་ ༧༩ ནང་གསེས་ ༢༤ ནང་གསལ་ལྟར་སྐབས་རེའི་འཐུས་མིའི་ཡུན་ཚད་ལོ་གསུམ་རེ་ཡིན། ༤ས་གནས་འཐུས་མིའི་ཡུན་ཚད་མ་རྫོགས་གོང་འཕོ་འགྱུར་གཏོང་དགོས་ཀྱི་གནས་ཚུལ་བྱུང་ན་ལས། དེ་མིན་སྐབས་རེའི་ཡུན་ཚད་ལོ་གསུམ་རེ་ཡིན།
བཅའ་ཁྲིམས་ཤོག་གྲངས་ ༦༩ ཡིག་ཕྲེང་ ༡༠
དོན་ཚན་བརྒྱད་པ། ས་གནས་འཐུས་མིའི་ཚོགས་འདུའི་ཚོགས་གཙོ་དང༌། ཚོགས་གཞོན་པ།
- ༡༽སྐབས་སོ་སོའི་ས་གནས་འཐུས་མིའི་ཚོགས་ཐེངས་དང་པོའི་མཐུས་མིའི་རང་ཁོངས་ནས་ཚོགས་གཙོ་གཅིག་དང༌། ཚོགས་གཞོན་གཅིག་གསང་བའི་འོས་བསྡུས་ཀྱིས་མང་མོས་འདེམས་ཐོན་དགོས་པ་ཡིན།
- ༢༽འོས་འདེམས་ཀྱིས་བྱ་རིམ་དང་པོར་འོས་ཤོག་མང་ཐོན་རྩེ་ཏོག་གིས་འོས་གཞི་མི་བཞི་འདེམས་སྒྲུག་བྱ་དགོས་པ་དང༌། བྱ་རིམ་གཉིས་པར་འོས་གཞི་མི་གཞི་ནང་ནས་མཐའ་མའི་འོས་ཤོག་བསྡུས་ཏེ་འོས་གྲངས་མང་ཤོས་དེ་ཚོགས་གཙོ་དང༌། གཉིས་པ་དེ་ཚོགས་གཞོན་དུ་གཏན་འབེབས་གནང་དགོས་པ་ཡིན།
- ༣༽འོས་ཐོན་བྱུང་བའི་ཚོགས་གཙོ་དང་། ཚོགས་གཞོན་གཉིས་ཀྱི་ས་མིག་ཏུ་བར་མའི་འོས་བསྡུ་མ་དགོས་པར་ས་གནས་དེ་གཉིས་ཀྱི་འཐུས་མིའི་འོས་བསྡུའི་སྒུག་ཐོ་གཞིར་བཟུང་འོས་ཐོབ་མང་ཉུང་གོ་རིམ་ལྟར་ཚོགས་ཆུང་དེ་གའི་འཐུས་མིར་བསྐོ་དགོས། ནང་གསེས་ ༣ དང་༤ རིམ་བཞིན་ནང་གསེས་ ༤ དང ༥ བསྒྱུར་རྒྱུ།
- ༤༽འོས་ཐོན་བྱུང་བའི་ཚོགས་གཙོ་དང༌། ཚོགས་གཙོ་གཞོན་པ་གཉིས་ས་གནས་ཁྲིམས་ཞིབ་པའི་མདུན་སར་ལས་འཁུར་དམ་བཅའམ་ཁས་ལེན་བྱ་དགོས།
- ༥༽ ས་གནས་འཐུས་མིའི་སུམ་ཆ་གཉིས་ཡན་གྱི་མོས་མཐུན་ཐོག་ཚོགས་གཙོ་དང༌། ཚོགས་གཙོ་གཞོན་པ་འཕོ་ལེན་བྱེད་དགོས་པའི་སྐབས་དང༌། ས་སྟོང་ནམ་བྱུང་མཚམས་ཚབ་གསར་བསྐོ་བཞག་ཁྲིམས་ལུགས་ལྟར་འོས་བསྡུ་བྱ་དགོས་པ་ཡིན།
དོན་ཚན་དགུ་པ། ས་གནས་འཐུས་མིའི་ཚོགས་འདུ།
- ༡༽ས་གནས་འཐུས་མིའི་ཚོགས་འདུ་ (གྲོས་ཚོགས་) ལོ་རེར་ཐེངས་གཉིས་རེ་ཚོགས་བསྐོང་དགོས་རྒྱུ། དགོས་གལ་བྱུང་ན་ཚོགས་འདུ་འཕར་མ་བསྡུ་བསྐོང་ཆོག་རྒྱུ།
- ༢༽སུད་སི་དང་ལེཀ་ཊེན་སྤྲཡན་བོད་རིགས་མི་མང་འཐུས་མིའི་ཚོགས་འདུ་ལོེ་རེར་ཐེངས་དགུ་རེ་ཚོགས་བསྐོང་དགོས་རྒྱུ། དགོས་གལ་བྱུང་ན་ཚོགས་འདུ་འཕར་མ་བསྡུ་བསྐོང་ཆོག་རྒྱུ། ནང་གསེས་ ༢ རིམ་བཞིན་ནང་གསེས་ ༣ བསྒྱུར་རྒྱུ།
- ༣༽ལོ་རེའི་འཐུས་མིའི་ཚོགས་འདུ་ཚོགས་ཐེངས་དང་པོར་ལོ་དེའི་ཚོགས་འདུ་རིམ་པའི་དུས་ཚོད་དང་། ཚོགས་ཡུལ་བཅས་བཀའ་བསྡུར་གཏན་འབེབས་གནང་རྒྱུ། སྐབས་མཚམས་ཚོགས་དུས་དང་ཚོགས་ཡུལ་འགྱུར་བ་གཏོང་དགོས་རིགས་རྒྱུན་ལས་ནས་ཐག་གཅོད་ཀྱི་གསལ་བསྒྲགས་བྱ་རྒྱུ།
དོན་ཚན་བཅུ་པ། ས་གནས་འཐུས་མི་ཚོགས་འདུའི་ནང་འཐུས་མིའི་ཉུང་ཚད།
ས་གནས་འཐུས་མི་ཚོགས་འདུར་འཐུས་མི་རྩ་འབོར་སུམ་ཆ་གཉིས་འཛོམས་ཕྱིན་ཚོགས་འདུའི་ལས་དོན་བྱེད་ཆོག འཐུས་མིའི་རྩ་འབོར་ཆ་བགོས་བྱེད་སྐབས་འཕྲོས་ལྷག་སྐར་ཆ་བརྩི་མ་དགོས།
དོན་ཚན་བཅུ་གཅིག་པ། ས་གནས་འགོ་འཛིན་དང་འགོ་འཛིན་ལས་རོགས་ཚོགས་ཞུགས་ཆོག་པའི་ཐོབ་ཐང༌།
ས་གནས་འཐུས་མི་ཚོགས་འདུར་འཐུས་མི་རྩ་འབོར་སུམ་ཆ་གཉིས་འཛོམས་ཕྱིན་ཚོགས་འདུའི་ལས་དོན་བྱེད་ཆོག འཐུས་མིའི་རྩ་འབོར་ཆ་བགོས་བྱེད་སྐབས་འཕྲོས་ལྷག་སྐར་ཆ་བརྩི་མ་དགོས།
དོན་ཚན་བཅུ་གཉིས་པ། གྲོས་འཆར་འདོན་རྒྱུའི་ཐོབ་ཐང༌།
ས་གནས་ཀྱི་ལས་དོན་གང་གི་ཐད་གྲོས་འཆར་འདོན་རྒྱུར་ས་གནས་འཐུས་མི་ཚང་མར་འདྲ་མཉམ་གྱི་ཐོབ་ཐང་ཡོད། འཐུས་མི་མ་ཡིན་པའི་སྐྱེ་བོ་ཞིག་གིས་གྲོས་འཆར་འདོན་རྒྱུ་ཡོད་ཚེ། འཐུས་མི་ཞིག་གི་བརྒྱུད་འབུལ་ཆོག
དོན་ཚན་བཅུ་གསུམ་པ། གྲོས་བསྡུར་བཀག་བསྡོམས།
ས་གནས་འཐུས་མིའི་རྩ་འབོར་སུམ་ཆ་གཉིས་ཡན་གྱི་མོས་མཐུན་གྱིས་ས་གནས་ཁྲིམས་ཞིབ་པ་འཕོ་འགྱུར་གཏོང་དགོས་ཀྱི་གྲོས་འཆར་བྱུང་ན་ལས། དེ་མིན་ཁྲིམས་ཞིབ་པའི་ལས་དོན་བྱེད་ཕྱོགས་དང༌། ཁྲིམས་ཞིབ་བྱེད་བཞིན་པའི་དོན་གནད། ས་གནས་འཐུས་མིའི་ཚོགས་ཆུང་ཞིག་ནས་ཞིབ་འཇུག་བྱེད་བཞིན་པའི་དིན་གནས་བཅས་ཀྱི་སྐོར་གླེང་སློང་དང༌།གྲོས་བསྡུར་མི་ཆོག
དོན་ཚན་བཅུ་བཞི་པ། ས་གནས་ཀྱི་ལོ་འཁོར་སྔོན་རྩིས། ས་གནས་ཀྱི་ལོ་འཁོར་སྔོན་རྩིས་དང༌།
དཔལ་འབྱོར་དང་འབྲེལ་བའི་ལས་དོན་རྣམས་བཅའ་ཁྲིམས་དང་སྒྲིག་གཞི་ཁག་གི་དོན་ཚན་གཞིར་བཟུང་ས་གནས་འཐུས་མི་ལྷན་ཚོགས་ཀྱིས་ཐག་གཅོད་བྱ་རྒྱུ།
དོན་ཚན་བཅོ་ལྔ་པ། འཐུས་མི་ཚོགས་འདུའི་ནང་ལས་དོན་ཐག་གཅོད།
- ༡༽བཅའ་ཁྲིམས་དང༌། ཁྲིམས་ཡིག སྒྲིག་གཞི་ཁག་ཏུ་གསལ་ཁ་ཡོད་པའི་ཐག་གཅོད་བྱེད་ཚུལ་རྣམས་ཕུད། དེ་མིན་ལས་དོན་ཐམས་ཅད་སྤྱི་མོས་སམ། མང་མོས་ལྟར་ཐག་གཅོད་བྱ་རྒྱུ།
- ༢༽མང་མོས་འོས་བསྡུ་བྱ་དགོས་བྱུང་རིགས་ཕྱག་བརྐྱངས་པའམ། གསང་བའི་འོས་ཤོག་གང་རུང་གི་སྒོ་ནས་བྱེད་རྒྱུར་སྐབས་བསྟུན་ཚོགས་གཙོས་ཐག་གཅོད་བྱ་རྒྱུ།
- ༣༽ཚོགས་འདུའི་དབུ་བཞུགས་གནང་བཞིན་པའི་ཚོགས་གཙོ་ལས་གཞན་པའི་འཐུས་མི་ཡོངས་རྫོགས་ལ་འོས་བསྡུའི་ཐོབ་ཐང་ཡོད་ཅིང༌། འོས་ཤོག་འདྲ་མཉམ་བྱུང་ཚེ་ཚོགས་གཙོར་ཐག་གཅོད་ཀྱི་འོས་བསྡུ་བྱ་རྒྱུའི་ཐོབ་ཐང་ཡོད།
དོན་ཚན་བཅུ་དྲུག་པ། བཞུགས་མོལ་ཚོགས་འདུ།
- ༡༽ས་གནས་འཐུས་མི་ལྷན་ཚོགས་ནས་དགོས་གལ་ནམ་བྱུང་སྐབས་དམིགས་བསལ་བཞུགས་མོལ་ཚོགས་འདུ་བསྡུ་བསྐོང་བྱེད་ཆོག་ཅིང༌། བཞུགས་མོལ་ཚོགས་འདུ་འདི་རིགས་ལ་ས་གནས་སྤྱི་འཐུས་དང༌། དོན་གཅོད། ས་གནས་འགོ་འཛིན་དང་འགོ་འཛིན་ལས་རོགས། གཞུང་ཞབས། ས་གནས་འཐུས་ཚོགས་ཀྱི་ངོས་ལེན་ཡོད་པའི་ཚོགས་པ་སྐྱིད་སྡུག་ཁག་གི་འཐུས་མི༥གཞན་ཡང་ཁྱད་མཁས་མི་སྣ་དང༌། སྐུ་མགྲོན་སོགས་རྒྱུན་ལས་ཀྱི་ཐག་གཅོད་ལྟར་ཚོགས་འདུར་འབོད་བསྐོང་བྱ་འཐུས། ༥ ད་ཡོད་ངོས་ལེན་ཡོད་པའི་ཚོགས་པ་ཡུ་རོབ་གཞོན་ནུའི་མཐུན་ཚོགས། སུད་སི་བོད་རིགས་བུད་མེད་ཚོགས་པ། སུད་བོད་མཐུན་གྲོགས་ཚོགས་པ། དམིགས་བསལ།
- ༢༽བཞུགས་མོལ་ཚོགས་འདུར་ཐག་གཅོད་བྱུང་བའི་དོན་གནད་རྣམས་ས་གནས་འཐུས་ཚོགས་ཀྱིས་བསྐྱར་ཞིབ་དང༌། ངོས་ལེན་གནང་དགོས་ཤིང༌། གལ་ཏེ་ངོས་ལེན་མ་བྱུང་ཚེ་ངོས་ལེན་མ་བྱུང་བའི་དོན་གནད་རྣམས་ལག་བསྟར་བྱས་མི་ཆོག
- ༣༽བཞུགས་མོལ་ཚོགས་འདུ་དགོས་གལ་བྱུང་མཚམས་ཚོགས་གཙོས་ཚོགས་བསྐོང་ཆོག་རྒྱུ།
དོན་ཚན་བཅུ་བདུན་པ། ས་གནས་འཐུས་ཚོགས་ཀྱི་རྒྱུན་ལས།
- ༡༽ས་གནས་འཐུས་མི་ཚོགས་འདུའི་རྒྱུན་ལས་ཚོགས་ཆུང་ཞིག་དགོས་པ་དང༌། ཚོགས་གཙོ་ཚོགས་གཞོན་གཉིས་ཐོག་འཐུས་མི་རང་ཁོངས་ནས་རྒྱུན་ལས་མི་གྲངས་བཅུ་གཅིག་འོས་འདེམས་བྱ་རྒྱུ།
- ༢༽རྒྱུན་ལས་འདེམས་ཐབས་དང༌། ལས་འགན་བཀོད་བསྒྲིགས་འཐུས་མི་ཚོགས་འདུས་གཏན་འབེབས་བྱ་རྒྱུ།
- ༣༽ རྒྱུན་ལས་བཅུ་གསུམ་ནང་ཚོགས་གཙོ་དང་ཚོགས་གཞོན་གཉིས་ཕུད། གཞན་བཅུ་གཅིག་ལ། བོད་འཇར་ཚོགས་དྲུང་གཉིས། དངུལ་གཉེར་གཉིས། ཟློས་གར་སྤྱི་ཁྱབ་འགན་འཛིན་གཅིག ཕྱི་འབྲེལ་བ་གཅིག གཉེར་པ་གཉིས། རྩིས་པ་གཅིག བོད་སློབ་སྤྱི་ཁྱབ་འགན་འཛིན་གཅིག གསར་འཕྲིན་དང་དྭང་བླང་དཔྱ་ཁྲལ་གཅིག་ལྕོགས་འགན་འཛིན་བཅས་ཀྱི་ལས་འགན་འཐུས་ཚོགས་ནས་གཏན་འབེབས་བྱ་རྒྱུ།
དོན་ཚན་བཅོ་བརྒྱད་པ། ཚོགས་གཙོ་ཚོགས་གཞོན་གཉིས་ཕུད། རྒྱུན་ལས་གཞན་དགུའི་ལས་འགན།
- ༡༽ བོད་འཇར་ཚོགས་དྲུང་གཉིས་ནས་འཐུས་ཚོགས་ཀྱི་ཡིག་ཆ་ཁག་བདག་གཉར་གཅེས་འཛིན་དགོས་པ་དང༌། ཚོགས་འདུར་ཚིག་ཐོ་འགོད་རྒྱུ། ཕྱི་ནང་ཡིག་འབྲེལ་བྱེད་སྒོ་ཁག་གི་འགན་ལེན་བྱ་རྒྱུ།
- ༢༽དངུལ་གཉེར་གཉིས་ནས་མི་མང་སྤྱི་དངུལ་སྤྲོད་ལེན་དང་འབྲེལ་ལག་ཡོད་དངུལ་འབབ་བདག་ཉར་གང་གཟབ་བྱ་རྒྱུ། དཔལ་འབྱོར་འདུ་འགོད་ཀྱི་ལས་ཀ་ཇི་བྱས་སྐབས་འཕྲལ་བྱུང་སོང་རྩིས་ཀྱི་འགན་འཁུར་རྐང་ལེན་ཐོག དུས་སྐབས་སོ་སོའི་རྩིས་ཞིབ་སྐབས་དངུལ་རྩིས་བྱུང་སོང་བསྡད་གསུམ་གྱི་འགྲེལ་བརྗོད་རྣམས་ཁམས་དངས་འཇོག་དགོས་རྒྱུ།
- ༣༽སུད་སི་དང་ལེཀ་ཊེན་སྤྲཡན་བོད་རིགས་ཟློས་གར།
ཀ༽ སུད་ས་དང་ལེཀ་ཊེན་སྤྲཡན་བོད་རིགས་ཟློས་གར་ཚོགས་པའི་འགན་དབང་རྣམས་འཐུས་མིའི་ཚོགས་འདུས་འོས་འདེམས་བྱས་པའི་འགན་འཛིན་ལྷན་ཚོགས་ལ་ཡོད།
ཁ༽སྤྱི་ཁྱབ་འགན་འཛིན་ཞིག་ས་གནས་འཐུས་མིའི་ཚོགས་འདུ་ནས་འཐུས་མིའི་རྒྱུན་ལས་སུར་འོས་ཤིག་ལ་འོས་འདེམས་དགོས་རྒྱུ།
ག༽འགན་འཛིན་ལས་རོགས་ཤིག་ས་གནས་འཐུས་ཚོགས་དང་། ཟློས་གར་ཚོགས་མི་ཐུན་མོང་ནས་བོད་མི་སུ་འོས་ཤིག་འོས་འདེམས་བྱ་རྒྱུ།
- ༤༽ ཕྱི་འབྲེལ་པ་ནས་ཚོགས་གཙོ་དང་ཚོགས་གཞོན་གཉིས་ཀྱི་བཀོད་ཁྱབ་འོག་འཐུས་ཚོགས་ནས་ལས་འགུལ་བརྩམ་རིགས་གང་ཡིན་སྐབས་སུ་སྤུ་ལི་སི་ནས་ཆོག་མཆན་ཞུ་རྒྱུ། མི་མང་འཛོམས་ཡུལ་ཚོགས་ཁང་གཡར་རྒྱུ། གསར་འགོད་པ་བསྡུ་བསྐོང་བྱེད་རྒྱུ་བཅས་འབྲེལ་ཡོད་ཕྱི་ནང་མི་རིགས་ཅི་ཡིན་ལ་འབྲེལ་ལམ་བྱེད་དགོས་རྒྱུ།
- ༥༽གཉེར་པ་གཉིས་ཀྱིས་སྤྱི་རྫས་དངོས་རིགས་ཇི་ཡོད་ཐོ་བཀོད་ཀྱིས་ཉར་ཚགས་དང་འབྲེལ་སྤྱི་དངུལ་འདུ་འགོད་ཆེད་དངོས་ཟོག་ཉོ་ཚོང་གི་འགན་འཁུར་རྐང་ལེན་ཐོག་ལོ་རེའི་བྱུང་སོང་གི་རྩིས་ཁྲ་ཁམས་དངས་དང་དངུལ་འབབ་བཅས་དངུལ་གཉེར་གཉིས་ལ་རྩིས་སྤྲོད་དགོས་རྒྱུ།
- ༦༽ རྩིས་པས་མི་མང་གི་སྤྱི་དངུལ་བྱུང་སོང་བསྡད་གསུམ་གྱི་རྩིས་ཁྲ་ཁམས་དངས་བཟོ་དགོས་པ་དང༌། རྩོས་དེབ་རྣམས་བདག་གཅེས་ཐོག་དཔལ་འབྱོར་བཟོ་བསྒྲུབ་ཀྱི་ལས་འགུལ་ཇི་བྱས་ཀྱིས་མཚོན་བྱུང་སོང་རྩིས་ཁྲ་ཟླ་བ་གཅིག་གི་རྗེས་སུ་འཐུས་མིའི་ཚོགས་འདུར་གསལ་བཤད་དགོས་པ་དང༌། ལོ་རེའི་མཚམས་རྩིས་ཁྲ་ཁམས་དངས་རེ་འདོན་སྤེལ་བྱ་དགོས།
- ༧༽བོད་སློབ་སྤྱི་ཁྱབ་འགན་འཛིན་ནས་ས་གནས་སོ་སོའི་བོད་སློབ་འགན་འཛིན་དང་། དགེ་རྒན་བཅས་ཀྱི་མཉམ་གཙོ་བོ་ནང་ཆོས་དང་། བོད་ཀྱི་སྐད་ཡིག་བཅས་ཕྲུ་གུའི་ཤེས་ཡོན་ཡར་རྒྱས་ཡོང་སླད་འཕྱར་གྲུ་མཉམ་འདེགས་བྱ་རྒྱུ་དང་། འཛིན་སྐྱོང་བྱ་ཕྱོགས་ཐད་འཐུས་ཚོགས་ནས་གཏན་འབེབས་ཞུས་པའི་རང་དབང་གི་སྒྲིག་གཞི་ཟུར་གསལ་ལྟར་ལག་བསྟར་བྱ་རྒྱུ།
- ༨༽གསར་འཕྲིན་དང་དང་བླངས་དཔྱ་ཁྲལ་གཅིག་ལྕོག་འགན་འཛིན།
ཀ༽གསར་འཕྲིན་དང་འཐུས་མིའི་ཚོགས་འདུའིོ་དབར་འབྲེལ་མཐུད་བྱ་རྒྱུ།
ཁ༽སྤྱི་འཐུས་རྒྱུན་ལས་དང་བླངས་དཔྱ་ཁྲལ་སྡེ་ཚན་དང་། དཔལ་འབྱོར་ལས་ཁུངས། ས་གནས་འཐུས་མི་བཅས་མཉམ་དུ་འབྲེལ་མཐུད་ཀྱིས་དཔྱ་ཁྲལ་ལོ་ལྟར་ཁྲིམས་ལུགས་ལྟར་བསྡུ་ལེན་ཚགས་ཚུད་ཐུབ་པ་དང་ལོ་འཁོར་དངུལ་འབབ་སྒྲུབ་འབུལ་ཐོ་གཞུང་ཁ་གསལ་དཔར་འགྲེམས་ཀྱིས་འབྲེལ་ཡོད་ལས་ཁུངས་སོ་སོར་འབུལ་ལམ་དགོས་རྒྱུ།
དོན་ཚན་བཅུ་དགུ་པ། རྒྱུན་ལས་འཕོ་འགྱུར།
ས་གནས་འཐུས་མི་ཚོགས་འདུ་ནས་རྒྱུན་ལས་འཕོ་འགྱུར་བྱ་དགོས་རིགས་འཐུས་མི་སུམ་ཆ་གཉིས་ཡན་མོས་མཐུན་བྱུང་ན་ཐག་གཅོད་ཆོག་རྒྱུ།
དོན་ཚན་ཉི་ཤུ་པ། ས་གནས་ཚོགས་ཆུང༌།
ས་ཁུལ་གང་ཞིག་ཏུ་བོད་མི་ཁྱིམ་ཚང་ལྔ་ལས་མ་ཉུང་བ་ཡོད་པ་དེར་ས་གནས་ཚོགས་ཆུང་རེ་བཙུག་དགོས་པ་དང༌། ཁྱིམ་ཚང་ལྔ་ལས་ཉུང་བ་ཡོད་ཚེ་ཉེ་འབྲེལ་ཚོགས་ཆུང་ཞིག་ཏུ་ཟླ་བསྒྲིལ་བྱ་དགོས།
དོན་ཚན་ཉེར་གཅིག་པ། ས་གནས་འཐུས་མིའི་ཚོགས་འདུ་འཕོ་འགྱུར།
- ༡༽ ས་གནས་འགོ་འཤིན་དང་ལས་རོགས་(ཡོད་པ་ཡིན་ན་)གཉིས་ཀྱིས་ཚོགས་གཙོ་ཚོགས་གཞོན་གཉིས་ལ་གོ་བསྡུར་གྱིས་ས་གནས་འཐུས་མིའི་ཚོགས་འདུ་འཕོ་འགྱུར་གཏོང་དགོས་ཀྱི་གནས་ཚུལ་བྱུང་ན་ས་གནས་མི་མང་གིས་འོས་བསྡུ་བྱས་སྟེ། མང་མོས་ཇི་བྱུང་ལྟར་ཐག་གཅོད་བྱ་རྒྱུ།
- ༢༽
ཀ༽ འཐུས་མི་བྱེ་བྲག་པ་འཕོ་འགྱུར་གཏོང་དགོས་བྱུང་ཚེ་ས་གནས་ཚོགས་ཆུང་མི་མང་ནས་འོས་བསྡུས་ཀྱིས་མང་མོས་ཇི་བྱུང་ལ་ཐག་གཅོད་བྱ་རྒྱུ།
ཁ༽ འཐུས་མི་ཚོགས་འདུ་ནས་འཐུས་མི་བྱེ་བྲག་པ་འཕོ་འགྱུར་གཏོང་དགོས་ཚེ། ས་གནས་མི་མང་ལ་འཐུས་ཚོགས་རྒྱུན་ལས་ནས་འགྲེལ་བརྗོད་བྱས་རྗེས། གོང་གསལ་ ༢ ༼ཀ༽ ལྟར་ཐག་གཅོད་བྱ་རྒྱུ།
ག༽ འཐུས་མི་གང་ཞིག་ས་གནས་འཐུས་ཚོགས་(གྲོས་ཚོགས་)ཀྱི་ཚོགས་ལོ་རེར་ཐེངས་གཅིག་ཚོགས་བཅར་ངེས་པར་ཐུབ་པ་དགོས་རྒྱུ། སྤྱི་འཐུས་རྒྱུན་ལས་ཀྱི་ལམ་སྟོན་ལྟར་འཐུས་མིའི་དུས་ཡུན་ལོ་གསུམ་ནང་ཚོགས་འདུ་སུམ་ཆ་གཉིས་ཚོགས་བཅར་ཞུ་མི་རྣམས་ལ་སྤྱི་ལྷན་ནས་ཕྱག་འཁྱེར་འཐོབ་རྒྱུ།
- ༣༽ ས་གནས་འཐུས་མིའི་ཚོགས་འདུའམ། ཚོགས་འཐུས་བྱེ་བྲག་པ་འཕོ་འགྱུར་བྱུང་ཚེ། ཉིན་གྲངས་སུམ་ཅུའི་ནང་ཚུད་གསར་དུ་འོས་འདེམས་ཀྱིས་བསྐོ་བཞག་ཟིན་པ་དགོས་རྒྱུ།
དོན་ཚན་ཉེར་གཉིས་པ། ས་གནས་རང་དབང་བདེན་པའི་ལས་འགུལ་ཚོགས་ཆུང་གི་ལས་དོན།
བཅའ་ཁྲིམས་དོན་ཚན། ༦༠ ནང་གསེས་ ༡(༥)པོའི་ནང་གསལ་ལྟར་གྱི་ས་གནས་རང་བདེན་ཚོགས་ཆུང་ཟུར་འཛུགས་མ་བྱུང་བར་བཅའ་ཁྲིམས་དོན་ཚན་ ༦༠(༦)པ་ནང་གསལ་ལྟར་རང་དབང་བདེན་པའི་ལས་འགུལ་གྱི་ས་གནས་ཚོགས་ཆུང་གི་ལས་དོན་རྣམས་ས་གནས་འཐུས་མི་ཚོགས་འདུས་བསྒྲུབ་འཐུས་སྤྱི་ལྷན་ནས་དམིགས་བསལ་ཆོག་མཆན་ཞུ་རྒྱུ་དང་། རང་བདེན་ཚོགས་ཆུང་གི་ལས་དོན་ཁག་འཐུས་ཤོར་མེད་པ་ས་གནས་འཐུས་མི་ཚོགས་འདུ་ནས་བྱ་དགོས་པ་ཡིན།
(༥) བཙན་བྱོལ་བོད་མིའི་གནས་ཡུལ་ས་ཁུལ་གང་སར་བོད་རང་དབང་བདེན་པའི་ལས་འགུལ་གྱི་ས་གནས་ཚོགས་ཆུང་རེ་དགོས་པ་སྒྲིག་གཞི་གཞིར་བཟུང་ས་གནས་མི་མང་ནས་འོས་བསྡུ་བྱས་པའི་ཚོགས་མི་གསུམ་ལས་མི་ཉུང་ཞིང་། བཅུ་གཅིག་ལས་མ་མང་བ་རེ་དགོས། (བཅའ་ཁྲིམས། དོན་ཚན་དྲུག་ཅུ་པ། བོད་རང་དབང་བདེན་པའི་ལས་འགུལ་གྱི་ས་གནས་ཚོགས་ཆུང་། ནང་གསེས་༡)
(༦) གོང་གསལ་ནང་གསེས་ ནང་གསལ་སྒྲིག་གཞི་གཞིར་བཟུང་ཚོགས་ཆུང་འཛུགས་མི་ཐུབ་པའི་རིགས་ལ་ད་མུས་སྒྲིག་འཛུགས་ཇི་ཡོད་གནས་འཐུས་སྤྱི་ལྷན་ནས་དམིགས་བསལ་ཆོག་མཆན་གནང་འཐུས། (བཅའ་ཁྲིམས། དོན་ཚན་དྲུག་ཅུ་པ། བོད་རང་དབང་བདེན་པའི་ལས་འགུལ་གྱི་ས་གནས་ཚོགས་ཆུང་། ནང་གསེས་ ༤)
དོན་ཚན་ཉེར་གསུམ་པ། སྐད་ཡིག་ཚད་འཛིན།
སྐད་ཡིག་གཞན་དུ་ཕབ་བསྒྱུར་བྱས་པའི་སྒྲིག་གཞིའི་ཚིག་དོན་ཁག་འགྲེལ་བརྗོད་བྱ་ཚུལ་ལ་རྩོད་གླེང་བྱུང་ཚེ་བོད་ཡིག་ཐོག་བྲིས་པའི་ཡིག་གཞིར་རྩ་འཛིན་ཆ་འཇོག་བྱ་རྒྱུ།
དོན་ཚན་ཉེར་བཞི་པ། བར་རྒལ་གྱི་ཆ་རྐྱེན།
སྒྲིག་གཞི་འདི་བཞིན་འགོ་འཛུགས་ལག་བསྟར་མ་བྱས་གོང་གི་སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་འཐུས་མིའི་ཚོགས་འདུའི་ལས་དོན་དང་། སྒྲིག་འཛུགས་ནས་ཐག་གཅོད་ལག་ལེན་ཟིན་པ་རྣམས་སྒྲིག་གཞི་འདིའི་དོན་གནད་ཁག་དང་མཐུན་མིན་གྱི་ཁག་དཀྲི་བྱས་ཏེ་སྙོན་འཛུགས་བྱས་མི་ཆོག
དོན་ཚན་ཉེར་ལྔ་པ། སྒྲིག་གཞི་བསྐྱར་བཅོས།
སྒྲིག་གཞི་འདི་བསྐྱར་བཅོས་ནམ་དགོས་མཚམས་ས་གནས་འཐུས་མིའི་ཚོགས་འདུ་རྩ་འབོར་སུམ་ཆ་གཉིས་ཡན་གྱི་མོས་མཐུན་གཏན་འབེབས་བྱས་པའི་སྒྲིག་གཞིའི་དོན་གནད་འཆར་ཟིན་ལ་དབུས་སྤྱི་འཐུས་རྒྱུན་ལས་ནས་བཅའ་ཁྲིམས་དགོངས་དོན་གྱི་ཆོག་མཆན་ཐོབ་རྗེས་བསྐྱར་བཅོས་ཆོག་རྒྱུ།
༡༩༩༥ ཕྱི་ཟླ་ ༥ ཚེས་ ༢༨ ཉིན་འཐུས་མིའི་ཚོགས་འདུའི་ཐོག་སུད་སི་ལེཀ་ཊེན་སྤྲཡནབོད་རིགས་མི་མང་གི་སྒྲིག་གཞི་དང་ས་གནས་འཐུས་མིའི་ཚོགས་འདུའི་སྒྲིག་གཞི་འདི་ཉིད་སྤྱི་མོས་ཀྱིས་ཐག་གཅོད་གཏན་འབེབས་ཞུས།
ཟུར་སྣོན་ཡིག་ཆ། དང་པོ།
ས་གནས་འཐུས་མི་ཚོགས་འདུའི་ཚོགས་གཙོ་དང༌། ཚོགས་གཙོ་གཞོན་པའི་ལས་འཁུར་དམ་བཅའ་འམ་ཁས་ལེན།
༄༅། །བདག་་་་་་་་་་་་་་་་་་ཞེས་བགྱི་བ། སུད་སི་དང་ལེཀ་ཊེན་སྤྲཡནབོད་རིགས་མི་མང་གི་ས་གནས་འཐུས་མི་ཚོགས་འདུའི་ཚོགས་གཅོར། ཡང་ན། ཚོགས་གཙོ་གཞོན་པར་འོས་འདེམས་བྱུང་བ་ལགས་ན། བཙན་བྱོལ་བོད་མིའི་བཅའ་ཁྲིམས་དདང༌། ས་གནས་འཐུས་མི་ཚོགས་འདུའི་སྒྲོག་གཞི་ལ་ཡིད་ཆེས་བློ་གཏད་ཀྱི་ཐོག་ནས། ཚོགས་གཙོའི་ཡང་ན་ ཚོགས་གཙོ་གཞོན་པའི་ལས་འཁུར་ཞུ་སྒོ་མཐའ་དག་བཅའ་ཁྲིམས་དགོངས་དོན་དང༌། སྒྲིག་གཞིའི་འབྲུ་དོན་རྣམས་འགལ་མེད་ཐོག རང་དོན་ཕྱོགས་ལྷུང་དང༌། འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས་རང་ནུས་གང་ཐེག་ཞུ་རྒྱུའི།
༡ མཆོག་གསུམ་དཔང་བཙུགས་ཀྱི་དམ་བཅའ་བརྟན་པོ་ཞུ་རྒྱུ་ཡིན།
༢ ཁས་ལེན་གཙང་མ་ཞུ་རྒྱུ་ཡིན།
ཟུར་སྣོན་ཡིག་ཆ། གཉིས་པ།
ས་གནས་འཐུས་མིའི་ལས་ཁུར་དམ་བཅའམ། ཁས་ལེན།
༄༅། །བདག་་་་་་་་་་་་་་་་་་་ཞེས་བགྱི་བ་སུད་སི་དང་ལེཀ་ཊེན་སྤྲཡན་ས་གནས་འཐུས་མི་ཚོགས་འདུའི་འཐུས་མིར་འོས་འདེབས་བྱུང་བ་ལགས་ན། བཙན་བྱོལ་བོད་མིའི་བཅའ་ཁྲིམས་དང་། ས་གནས་འཐུས་མིའི་ཚོགས་འདུའི་སྒྲིག་གཞི་ལ་ཡིད་ཆེས་བློ་གཏད་ཀྱི་ཐོག་ནས་ས་གནས་འཐུས་མི་ལས་འཁུར་ཞུ་སྒོ་མཐའ་དག་བཅའ་ཁྲིམས་དགོངས་དོན་དང་། སྒྲིག་གཞིའི་འབྲུ་དོན་རྣམས་འགལ་མེད་ཐོག རང་དོན་ཕྱོགས་ལྷུང་དང་། འཇིགས་ཞུམ་ཆགས་སྡང་མེད་པར། དྲང་བདེན་དང་ལྷག་བསམ་ཟོལ་མེད་ཀྱི་སྒོ་ནས་རང་ནུས་གང་ཐེག་ཞུ་རྒྱུའི།
༡ མཆོག་གསུམ་དཔང་བཙུགས་ཀྱི་དམ་བཅའ་བརྟན་པོ་ཞུ་རྒྱུ་ཡིན། ཡང་ན། ༢ ཁས་ལེན་གཙང་མ་ཞུ་རྒྱུ་ཡིན།
ཟུར་སྣོན་ཡིག་ཆ། གསུམ་པ།
ས་གནས་ཁྲིམས་ཞིབ་པའི་དམ་བཅའམ། ཁས་ལེན།
༄༅། །བདག་མིང་་་་་་་་་་་་་་་་་་་་་་་་་་ཞེས་བགྱི་བ་བཙན་བྱོལ་བོད་ཀྱི་ས་གནས་ཁྲིམས་ཞིབ་པར་བསྐོ་བཞག་བྱུང་ལགས་ན།
བཙན་བྱོལ་བོད་མིའི་བཅའ་ཁྲིམས་དང༌། ས་གནས་འཐུས་མི་ཚོགས་འདུའི་སྒྲིག་གཞི་བཅས་ལ་ཡིད་ཆེས་ཀྱི་ཐོག་ནས། ས་གནས་ཁྲིམས་ཞིབ་པའི་ལས་འཁུར་མཐའ་དག་བཅའ་ཁྲིམས་ཀྱི་དགོངས་དོན་དང༌། སྒྲིག་གཞི་འགལ་མེད་ཐོག་རང་དོན་ཕྱོགས་ལྷུང་དང༌། འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས་ལེགས་ཉེས་འབྱེད་པའི་རྣམ་དཔྱོད་དང༌། ནུས་པ་དང་ཐེག་ཞུ་རྒྱུའི།
༡ མཆོག་གསུམ་དཔང་བཙུགས་ཀྱི་དམ་བཅའ་བརྟན་པོ་ཞུ་རྒྱུ་ཡིན། ཡང་ན། ༢ ཁས་ལེན་གཙང་མ་ཞུ་རྒྱུ་ཡིན།
